Në një takim elektoral në Devoll, kryesocialisti Edi Rama ka bërë një krahasim të fortë mes të kaluarës dhe të tashmes politike në këtë zonë, duke sjellë në vëmendje figurën e Dritëro Agollit, që përfaqësonte dikur Devollin në Kuvend, dhe duke kritikuar ashpër opozitën për përfaqësimin aktual.

Në një fjalim me tone ironike e të drejtpërdrejta, Rama iu referua incidentit të një dite më parë ku kandidati demokrat Bledion Nallbati u konfliktua me një shofer kamioni, duke e cilësuar atë si “rrugaç”, simbol i rënies së standardeve të opozitës në përzgjedhjen e përfaqësuesve të saj.

“Devolli kishte Dritëro Agollin deputet në Parlament. Ndërkohë që sot ka sjellë në parlament një rrugaç, të një niveli që nuk e di se në cilën vjershë të Dritëroit mund të gjente vend… ndoshta te fjala kokëbosh apo trangull”, u shpreh Rama me sarkazëm.

Ai rrëfeu edhe një kujtim personal me Agollin dhe të atin e tij, për të treguar dimensionin moral e kulturor që përfaqësonte më parë Devolli në Kuvend. Krahasimi i drejtpërdrejtë me situatën aktuale ishte një kritikë e fortë ndaj Partisë Demokratike, të cilën Rama e akuzoi për rënien e pazarit politik, duke thënë:

“Nga një poet kombëtar te një turp vendor… realisht më duket fundi.”

Rama pyeti publikisht demokratët e Devollit sesi është e mundur që kanë rënë në nivelin që të çojnë në Kuvend njerëz që, sipas tij, përfaqësojnë turpin, jo qytetarinë.

Fjalimi ishte i mbushur me tone emocionalë, ironikë dhe retorikë politike, duke e pozicionuar Ramën si një mbrojtës të vlerave tradicionale intelektuale dhe qytetare, përballë asaj që ai e quan degradim i opozitës.