I ftuar në një emision televiziv për të diskutuar mbi situatën e sigurisë në vend, eksperti i kriminalistikës, Artan Rexhepi, shprehu shqetësimin e tij për përkeqësimin e situatës kriminale në Shqipëri. Ai tha se vendi ka kaluar një muaj të vështirë, me krime të rënda që kanë ndodhur nga veriu në jug, duke theksuar se rritja e kriminalitetit është rezultat i çedimit të organeve të sigurisë.

Rexhepi shpjegoi se fushatat zgjedhore shpesh krijojnë një klimë të ngarkuar, e cila nxit përplasjet midis grupeve kriminale. Ai shtoi se liderët e këtyre grupeve, të cilët janë në kërkim pas përgjimeve, po tërhiqen, duke krijuar hapësirë për përplasje midis grupeve të nivelit të tretë.

“Kokaina po shitet lirshëm në Tiranë, dhe duket se disa inspektorë dhe shefa krimesh po mbyllin sytë ndaj këtij fenomeni,” u shpreh Rexhepi, duke kritikuar organet e sigurisë për dështimin në parandalimin e krimeve të rënda, si dhe ngjarjen e rëndë në Shkodër.

Ai theksoi se shteti duhet të reagojë fuqishëm dhe të veprojë si një “kosë bari” që pret çdo tentativë kriminale. Situata në Pogradec dhe humbja e besimit të publikut, sipas tij, kanë thelluar krizën, duke bërë që qytetarët të mos bashkëpunojnë me policinë.

Rexhepi përfundoi duke thënë se në polici nevojitet një “tërmet i madh” që të trondisë strukturat dhe të adresojë problematikat, duke filluar nga niveli më i ulët deri te kreu i policisë.