Eksperti i kriminalistikës, Ervin Karamuço, në një intervistë , ka diskutuar për sfidat në parandalimin e aksidenteve rrugore dhe ka shprehur pikëpamjet e tij për mënyrat e efektivizuara për të luftuar këtë problem.

Ai vuri në dukje se shtimi i patrullave dhe radarëve në rrugë nuk ka sjellë rezultatet e dëshiruara, pasi shoferët shfrytëzojnë një aplikacion që informon për vendndodhjen e tyre. Karamuço argumentoi se kjo sjellë vetëm shtim të shpejtësisë në pikat e papërcaktuara dhe rrit rrezikun e aksidenteve. Sipas tij, është e rëndësishme të rishikohen strategjitë për të minimizuar aksidentet, duke përdorur mënyra më efikase për të kufizuar shpejtësinë dhe për të siguruar sigurinë në rrugë.

“Nuk i zerojmë dot ne aksidentet rrugore, ne thjeshtë rregullojmë sistemin që ato të minimizohen. Policia të heqë dorë nga patrullat dhe radarët. Sepse nuk ka kuptim të mbash të stacionuar policë në rrugë, kur ka një aplikacion që njerëzit shkruajnë se ku ka radarë. Dhe unë ul shpejtësinë dhe kaloj radarin, dhe pastaj e di se ku ndodhet radari i radhës. Janë 16 mijë veta që shkruajnë në këtë aplikacion”, u shpreh Karamuço.