Shkodër – Kryetarja e komanduar e Partisë Demokratike në Shkodër, Eliona Shkreli, ka prezantuar kandidatët për deputetë të qarkut, në prani të kreut të PD-së, Sali Berisha.

Në fjalën e saj, Shkreli akuzoi kryebashkiakun Benet Beci dhe Partinë Socialiste për lidhje me krimin dhe korrupsionin, duke theksuar se më 11 maj PD do të shënojë një fitore të thellë në këtë qark.

“PD ka kaluar sfida të mëdha, por sot jemi të bashkuar dhe gati për fitoren. Ne kemi një listë fituese, me njerëz që i kanë shërbyer komunitetit dhe i kanë qëndruar pranë qytetarëve. Ndërsa Benet Beci është kryebashkiaku i krimit, i bandave dhe i parave të drogës,” – deklaroi Shkreli.

Ajo theksoi se braktisja e Shkodrës nga Beci në mes të mandatit për ambiciet e tij personale është një akt i papranueshëm, që qytetarët do ta ndëshkojnë në zgjedhje.

“Kurrë më parë në Shkodër nuk ka ndodhur që një kryebashkiak të lërë qytetarët për interesat e tij politike. Më 11 maj, shkodranët do të dëshmojnë se kush është shumica e vërtetë dhe do të refuzojnë një pushtet të korruptuar,” – tha ajo.

Shkreli u bëri thirrje qytetarëve të votojnë për Partinë Demokratike dhe koalicionin për “Shqipërinë Madhështore”, si alternativa e vetme për një të ardhme më të mirë dhe rikthimin e vlerave demokratike në vend.