Mbrojtësi i Kombëtares Shqiptare, Elseid Hysaj, mund të largohet nga Lazio gjatë ditëve në vijim, sipas raportimeve të fundit nga mediat italiane. Pas një sezoni të vështirë, ku shpesh nuk është përfshirë në planet e trajnerit Baroni, Hysaj duket se është pranë një ndryshimi të mundshëm.

Lecce është klubi që ka shfaqur interes konkret për të siguruar shërbimet e 30-vjeçarit, fillimisht në formë huazimi. Mbrojtësi ka ende një kontratë të vlefshme deri në qershor 2026 me Lazion, por mungesa e aktivizimit të rregullt dhe kërkimi për më shumë minuta në fushë mund ta shtyjnë atë drejt një aventure të re.

Vendimi përfundimtar pritet të varet nga dëshira e vetë Hysajt për të ndryshuar ambient dhe për të gjetur më shumë hapësira në një ekip si Lecce, ku ai mund të ketë një rol më të rëndësishëm në formacion. Mbetet për t’u parë se si do të zhvillohen tratativat në ditët në vijim.