Deputetja dhe zëvendëspresidentja e Partisë së Lirisë, Erisa Xhixho, ka reaguar ashpër ndaj raportit më të fundit të OECD, i cili konfirmon se mësuesit shqiptarë janë më të keqpaguarit në Europë.

Përmes një postimi në rrjetet sociale, Xhixho ka kritikuar qeverinë, duke e akuzuar për shpërfillje totale ndaj arsimit dhe mungesë investimi për mësuesit.

Faktet alarmante sipas OECD:

Mësuesit shqiptarë kanë pagat më të ulëta në Europë dhe janë më të prekurit nga inflacioni.
202 shkolla publike janë mbyllur në vetëm 5 vite.
58 mijë nxënës janë larguar nga Shqipëria në këtë periudhë.
Në vitin 2024, shkollave iu munguan mbi 2 mijë mësues.
Gjysma e mësuesve aktualë nuk kanë njohuritë e duhura për të dhënë mësim.

“Përtej propagandës boshe të qeverisë, faktet tregojnë se arsimi nuk është prioritet për këtë qeveri. Ndërkohë që mësuesit e pensionistët varfërohen, inceneratorët fantazmë marrin miliarda lekë,” shkruan Xhixho, duke denoncuar shpenzimin e 1.53 miliardë lekëve për inceneratorin e Tiranës, i cili është nën hetim.

“Qeveria ka dështuar me arsimin – Ringritja është prioriteti ynë!”

Në fund të reagimit të saj, Xhixho thekson se investimi në arsim është jetik për të ardhmen e vendit dhe duhet të jetë prioriteti kryesor. Ajo akuzon qeverinë se po braktis mësuesit dhe po nxit largimin masiv të rinisë, ndërsa fondet shkojnë për projekte korruptive.

“Për ne, arsimi është prioriteti numër një! Shqipëria nuk mund të humbasë më shumë mësues dhe nxënës,“ përfundon Xhixho.