Eurodeputeti bullgar Andrei Kovaçeviç, njëherësh kryetar i Komisionit Parlamentar të BE-së për Anëtarësimin e Ballkanit Perëndimor, ka vlerësuar nga Pusteci përparimin e Shqipërisë në procesin e integrimit evropian, duke theksuar se vendi ynë ndodhet ndër më të avancuarit në rajon për t’u bërë pjesë e Bashkimit Europian.

“Procesi i integrimit është jashtëzakonisht i rëndësishëm për të dyja palët — për Bashkimin Europian dhe për vendet kandidate. Në këtë situatë të ndërlikuar gjeopolitike, duhet të pranojmë sa më shpejt të gjitha vendet e Ballkanit Perëndimor,” tha Kovaçeviç gjatë një deklarate për mediat, raporton gazetarja Daniela Zisi për Klan News.

Eurodeputeti theksoi se çdo vend vlerësohet sipas meritave të veta, por në këtë kuadër Shqipëria dhe Mali i Zi janë më përpara në rrugën drejt BE-së, falë reformave të ndërmarra dhe angazhimit të institucioneve.

“Shpresa jonë është që në vitet e ardhshme të mund t’u urojmë mirëseardhjen si anëtarë të plotë të Bashkimit Europian disa prej vendeve të Ballkanit Perëndimor. Unë shpresoj që ndër to të jetë edhe Shqipëria,” u shpreh ai.

Kovaçeviç ndaloi edhe te marrëdhëniet rajonale, duke bërë thirrje për tejkalimin e ndasive historike dhe forcimin e bashkëpunimit mes vendeve të rajonit:

“Ballkani duhet të kapërcejë atë që ndoshta në të kaluarën na ka ndarë dhe sot të investojmë vetëm në marrëdhënie të mira fqinjësore, në lidhje infrastrukturore, ekonomike e tregtare.”

Ai theksoi se bashkëpunimi arsimor dhe kulturor mes të rinjve të Ballkanit duhet të zgjerohet, ndërsa kufijtë të bëhen sa më simbolikë, si në zonën Schengen.

“Kjo është plotësisht e realizueshme. Kjo varet nga vetë ju. Shqipërinë e konsideroj një nga shoqëritë më pro-evropiane dhe euroatlantike në rajon,” përfundoi Kovaçeviç.