Në vitin 2022, përqindja e individëve të moshës 16 vjeç e lart që konsideroheshin mbipeshë (përfshirë të obezët dhe ata me para-obezitet) në Bashkimin Europian arriti në 50.6%, sipas të dhënave të Eurostat. Në Shqipëri, kjo shifër ishte më e lartë, duke arritur në 56.5%, duke e renditur vendin ndër ata me nivelin më të lartë të obezitetit në Europë.

Shqipëria ka pasuar një trend të ngjashëm me vendet si Malta, ku 62% e popullsisë konsiderohen mbipeshë, dhe Finlanda (59.5%). Në krahasim, vendet me përqindjet më të ulëta të obezitetit janë Italia, me 41.3%, dhe Zvicra, me 45.2%.

Një dallim i dukshëm është edhe në mes të gjinive. Sipas të dhënave të Eurostat, 62.3% e meshkujve shqiptarë konsiderohen mbipeshë, një shifër mjaft e lartë, ndërsa femrat shqiptare janë më të kujdesshme, me 50.9% të tyre që konsiderohen mbipeshë. Femrat më të shëndosha janë ato të Letonisë dhe Turqisë, me përqindje përkatëse 56.7% dhe 55.2%.

Kategoritë e mbipeshës maten përmes Indeksit të Masës Trupore (BMI), ku individët me BMI mbi 25 klasifikohen si mbipeshë, ndërsa ata me BMI mbi 30 janë të obezë. Eurostat përditëson këto të dhëna për të ndihmuar në analizat e shëndetit publik dhe për të nënvizuar rëndësinë e ndjekjes së strategjive për parandalimin e obezitetit.