Fabrizio Corona është përfshirë në një tjetër polemikë me Chiara Ferragni, pas disa deklaratave të forta mbi marrëdhënien e saj me Fedez. Ish-paparaci italian ka bërë publike disa detaje të jetës private të Ferragni, duke pretenduar për sjellje jashtëmartesore dhe duke shkelur privatësinë e saj.

Sipas Il Corriere della Sera, avokati i Ferragni, Giuseppe Iannacone, i ka dërguar një paralajmërim zyrtar Coronës, duke i kërkuar të ndalojë publikimin e episodit të ri të emisionit të tij “Falsissimo”, ku do të shfaqeshin këto pretendime. Avokati ka theksuar se ky veprim do të përbënte shkelje të marrëveshjes private të nënshkruar mes palëve në shtator 2023, e cila ndalon Coronën të bëjë komente, vlerësime apo deklarata fyese ndaj jetës private të Ferragni.

Marrëveshja parashikon një dëmshpërblim prej 100 mijë euro për çdo shkelje, një shumë që mund të arrijë deri në 1.1 milionë euro nëse shkeljet vazhdojnë. Në rast se Corona nuk respekton këtë detyrim, Ferragni mund ta çojë çështjen në gjykatë, duke kërkuar kompensim financiar dhe masa të tjera ligjore kundër tij.

Ky zhvillim ka nxitur një tjetër debat në mediat italiane mbi privatësinë e figurave publike dhe kufijtë e gazetarisë investigative në botën e showbiz-it.