Prokuroria Themelore në Prizren ka intervistuar 72 persona të dyshuar për manipulim të votave në Suharekë, ndërsa 19 prej tyre janë ndaluar për 48 orë, raporton zyra për media e institucionit.

Sipas njoftimit zyrtar, të ndaluarit janë kryesues komisionesh, dhe dyshohet se kanë kryer veprën penale “Falsifikimi i rezultateve të votimit” nga neni 216, paragrafi 2 i Kodit Penal të Republikës së Kosovës.

“Pas autorizimit nga Prokuroria dhe në kuadër të këtij hetimi, janë intervistuar 72 të dyshuar. 19 prej tyre pas intervistimit në polici, me urdhër të Prokurorit të Shtetit, janë ndaluar për 48 orë, në cilësinë e kryesuesve të komisioneve, për shkak të dyshimit të bazuar se kanë kryer veprën penale ‘Falsifikimi i rezultateve të votimit’,” thuhet në njoftim.

Prokuroria ka theksuar se brenda afateve ligjore do të vlerësojë caktimin e masave për sigurimin e prezencës së të pandehurve gjatë procedurës.

Veprimet e Prokurorisë ndodhin pas rinumërimit të votave, i cili ka konstatuar manipulime në rezultatet e kandidatëve për deputetë brenda partive. Hetimet vazhdojnë, ndërsa qindra komisionerë nga disa qytete të Kosovës janë intervistuar dhe një pjesë e tyre janë ndaluar nga organet e rendit.