Vëmendja e të gjitha mediave botërore është kthyer sot në Iran, ku helikopteri me të cilin udhëtonin presidenti dhe ministri i Jashtëm ka pësuar një aksident. Nën frikën për fatet e liderëve të vendit, ngrihet pikëpyetja se çfarë do të ndodhë në rast se presidenti Raisi ka ndërruar jetë.

Komisioni Evropian ka aktivizuar shërbimin e tij të hartës satelitore për të ndihmuar në kërkimin e presidentit të Iranit. Komisioneri i menaxhimit të krizave, Janez Lenarcic, njoftoi në X se shërbimi po aktivizohet “për të mbështetur kërkimet pas aksidentit të helikopterit”, pas një kërkese për ndihmë nga Irani. Shërbimi i Menaxhimit të Emergjencave të Komisionit Evropian Copernicus ofron produkte hartash bazuar në imazhet satelitore.

Sipas ligjeve iraniane, në rast se presidenti ndërron jetë, postin e tij e merr zëvendëspresidenti i parë, i cili tani është Mohammad Mokhber. Marrja e detyrës do të bëhej pas miratimit të liderit suprem. Kreu i shtetit është lideri suprem Ali Khamenei dhe presidenti konsiderohet kreu i qeverisë, i dyti në komandë. Në rast të ndërrimit të jetës së presidentit, zëvendëspresidenti i parë do të jetë në detyrë dhe në 50 ditët e ardhshme vendi duhet të shkojë në zgjedhje për të zgjedhur një president të ri.

Aktualisht, ekipet e shpëtimit nuk kanë arritur ende në vendin e rrëzimit të helikopterit. Ali Bahadori Jahromi ka deklaruar se ende nuk ka asnjë përditësim për gjendjen e presidentit iranian dhe ministrit të jashtëm, Hossein Amirabdollahian, për shkak të kushteve të vështira dhe të ndërlikuara në vendin e aksidentit.

Ai theksoi se është e drejta e popullit dhe e medias të jenë në dijeni të lajmeve më të fundit për aksidentin e helikopterit dhe kërkoi durim dhe besim në grupet e ndihmës që po punojnë në terren.