Gazment Bardhi ka reaguar mbi Samitin e Procesit të Berlinit. Grupi Parlamentar i përfaqësuar nga Gazment Bardhi e konsideron Procesin e Berlinit me një rëndësi strategjike për Shqipërinë dhe Ballkanin Perëndimor.

Opozita mbështet pa kushte integrimin europian si prioritetin absolut kombëtar.

“Ne mbështesim çdo reformë që çon përpara anëtarësimin e Shqipërisë në BE dhe, në 33 vjet, kemi treguar se jemi partia që kemi vënë interesin kombëtar përpara interesit politik. Mirëpo, fatkeqësisht Samiti i Procesit të Berlinit e gjeti Shqipërinë me Qeverinë më të korruptuar në Europë dhe me një Parlament-noter të akteve korruptive të kryeministrit që, me forcën e kartonit, ka mbyllur çdo hapësirë institucionale për opozitën. Nuk ka asgjë të sinqertë në deklaratën e sotme të Kryetares së Kuvendit “për garantimin e legjitimitetit demokratik dhe për gjithëpërfshirje  në procesin e integrimit evropian të Shqipërisë”. Më së paku, kjo është hipokrizi!”, thuhet në reagim.

Sipas tyre, nuk ka një gjithëpërfshirje, por një tentativë të partisë në pushtet për të eliminuar opozitën dhe pluralizmin politik në Shqipëri.

• “Gjithëpërfshirja nuk sigurohet duke përjashtuar opozitën!
• Gjithëpërfshirja nuk sigurohet duke i mohuar opozitës të drejtat kushtetuese.
• Gjithëpërfshirja nuk sigurohet duke rrëzuar kërkesat për kontroll parlamëntar përmes Komisioneve Hetimore.
• Gjithëpërfshirja nuk sigurohet duke bllokuar të drejtën e opozitës për pjesëmarrje në Reformën Zgjedhore.
• Gjithëpërfshirja nuk sigurohet duke përjashtuar opozitën në mënyrë arbitrare dhe duke mbyllur çdo hapësirë institucionale.”