Këngëtarja Fjolla Morina ka rikthyer vëmendjen me një rrëfim emocional, ku ndau detaje për periudhën më të vështirë të jetës së saj. Në një intervistë televizive, ajo foli për ndarjen nga biznesmeni Fisnik Syla dhe përballjen me dënimin e saj pas arrestimit me armë në pikën kufitare të Morinës, ngjarje që e çuan në një gjendje të rënduar psikologjike.

Duke kujtuar sfidat e asaj periudhe, Fjolla tha: “Ka qenë periudha më e vështirë e jetës sime. Kam qenë në një pikë ku nuk kam dashur as të jetoj më.” Ajo pranoi se këto ngjarje e çuan drejt depresionit, duke i lënduar rëndë edhe ata që e rrethojnë.

E sinqertë në fjalët e saj, Fjolla nuk fshehu mllefin ndaj personit që, sipas saj, ishte shkaktar i këtyre vuajtjeve. “Kam kaluar në depresion për një plehrë. Ai nuk është krijesë, është njeri pa ndjenja,” u shpreh ajo me tone të ashpra.

Këngëtarja pohoi se këtë person nuk do ta falë kurrë për dhimbjen e shkaktuar dhe shtoi: “Do t’i kisha dhënë gjithçka për të mos e njohur kurrë.”

Pavarësisht sfidave, Fjolla tregoi se pas shumë peripecish ia ka dalë të rimëkëmbet dhe ta shohë jetën me një forcë të re: “Jam bërë më e fortë pas kësaj periudhe.”