Sekretari i Përgjithshëm i Partisë Demokratike, Flamur Noka, ka kërkuar nga foltorja e Kuvendit që çdo shqiptar emigrant të ketë mundësinë të votojë në zgjedhjet e 11 majit, duke theksuar se shteti duhet të sigurojë kushtet për të realizuar këtë të drejtë. Noka akuzoi eksponentët e Partisë Socialiste për përpjekje që të votojnë vetëm ata që janë në lista, duke u mohuar kështu të drejtën e votës emigrantëve që nuk kanë një dokument identifikimi shqiptar.

“Unë jam këtu për hallin e shqiptarëve. Me kushtetutë çdo shqiptar duhet që të votojë. Je shtet, çdo shtetas duhet që të votojë sa kohë e ka emrin në gjendjen civile dhe shteti duhet që ti krijoi kushtet për të votuar. Ju keni tartakutin, ju doni që të votojnë vetëm ata që keni në listat tuaja dhe nuk doni që të votojë e gjithë diaspora. Ju i mohoni të drejtën e votës, keni frikë. Ju brenda s’ju duan dhe jashtë ju refuzojnë,” tha Noka.

Në përgjigje, ministri i Drejtësisë, Ulsi Manja, iu përgjigj me tone të ashpra, duke theksuar se qeveria ka miratuar mundësinë për të lejuar shqiptarët në diasporë të ushtrojnë të drejtën e votës, por kjo mundësi vlen vetëm për ata që kanë pasaportë biometrike ose kartë identiteti të vlefshme. Manja kritikoi opozitën për bllokimin e ndryshimeve që mundësojnë një procedurë më të thjeshtuar dhe të drejtpërdrejtë për diasporën.

“Ne e votuam që shqiptarët në diasporë ta ushtrojnë të drejtën e votës. Që të jesh shtetas shqiptar ke të drejta dhe detyrime, për të ushtruar të drejtën e votës kodi ka duhet përcaktuar pasaport biometrike ose kartë ID të vlefshme. Ju thoni që ti jepet e drejta e votës edhe nëse kanë një dokument të vendit ku jetojnë. Po mirë me dokument shqiptar mund të votojnë një shtetas shqiptar në botë, jo, sepse nuk ja lejon,” tha Manja, duke shtuar se opozita nuk ka dashur kurrë të pranojë votën e diasporës.

Fjalës së Manjës, Noka iu përgjigj nga vendi, por mikrofoni i tij ishte i fikur, duke shtuar tensionet në këtë debat.