Forcat ruse mund të intensifikojnë sulmet e tyre duke përfituar nga afati kohor përpara mbërritjes së ndihmës së re ushtarake në Ukrainë! Kështu shkruan Instituti për Studimin e Luftës (ISW) në faqen e tij të internetit në dritën e miratimit të djeshëm në Dhomën e SHBA-së për alokimin e 60 miliardë dollarëve për Kievin.

Deri më tani, rusët janë përpjekur të shfrytëzojnë aftësitë e degraduara të mbrojtjes ajrore të Ukrainës në një përpjekje për të shembur rrjetin energjetik të vendit dhe për të shkaktuar dëme afatgjata në infrastrukturën e Kievit dhe kapacitetin e industrisë ushtarake, vërejnë ekspertët nga qendra studimore e SHBA.

Me ardhjen tashmë të pritshme të ndihmës ushtarake amerikane, Moska ka të ngjarë të intensifikojë operacionet luftarake dhe sulmet me raketa dhe drone për të “arritur objektiva të rëndësishëm operacionalë që sigurisht do të bëhen më të vështira për t’u marrë” pas mbërritjes së ndihmave, vazhdon ISW. Megjithatë, gjatë gjashtë muajve të fundit, forcat ruse kanë fituar vetëm avantazhe taktike “dhe nuk ka gjasa të arrijnë një përparim që do të rrëzonte vijën e frontit”, thekson raporti.