Fredi Beleri, i cili u lirua nga burgu për të shkuar në Strasburg dhe për të bërë betimin në Parlamentin Europian, ka dhënë një intervistë për mediat e huaja, ku ka folur për disa çështje. Sipas mediave greke, ai tha për “ANT1” se e marta ishte një ditë “gëzimi dhe emocioni të madh”. Ai deklaroi se ndjen një përgjegjësi të madhe për të përmbushur pritshmëritë që janë krijuar, ndërsa në të njëjtën kohë falënderoi kryeministrin Kyriakos Mitsotakis dhe popullin grek për besimin që treguan tek ai.

Beleri theksoi se gjatë gjithë kësaj kohe ka marrë shumë mesazhe mbështetjeje. Duke folur për të ardhmen e tij, ai tha se duhet të paraqitet sërish në burg të shtunën për të kryer pjesën e mbetur të dënimit. “Kam kërkuar lirimin nga burgu. Do të kthehem në Himarë, është shtëpia ime. Unë nuk do të largohem.
Ne duhet të kemi të drejta civile. Të kemi të drejtën e vetëvendosjes”, tha ai në mënyrë karakteristike. Për shtetin e së drejtës në Shqipëri ai theksoi se “Shumë raste tregojnë se drejtësia dhe ndarja e pushteteve nuk funksionojnë. Shqipëria është një vend evropian gjeografikisht dhe dua të besoj edhe nga ana kulturore. Por lidershipi i saj nuk ka bërë asnjë përpjekje për t’iu afruar Bashkimit Evropian”.