Sot mbahen zgjedhjet për kreun e ri të Partisë Demokratike në Elbasan, të cilat janë organizuar nga Komisioni i Rithemelimit, dhe kundërshtuar nga pjesa tjetër e demokratëve.
Në këto zgjedhje, raporton gazetarja e Fax News Entela Duka, shihet një rivalitet i fortë mes 5 kandidatëve Blendi Himçi, Eliona Gremi, Elior Vila, Sonila Daiu dhe Klodiana Çapja. Ajo që bie në sy është që katër kandidatët kryesorë janë pedagogë të nderuar që mbajnë titullin Doktor Shkencash.
Blendi Himçi 45 vjeç, Doktor Shkencash në Drejtësi, i diplomuar në Itali, aktualisht pedagog i së Drejtës në Universitetin e Elbasanit dhe mjaft i njohur në fushën e avokatisë. Mbart një karrierë të gjatë politike duke mbajtur dhe postin e këshillit të qarkut Elbasan.
Eliona Gremi, 40 vjeç, Doktore Shkencash në Finance dhe pedagoge e Universitetit të Elbasanit. Diplomuar si ekselente ka mbajtur dhe detyrën e Përgjegjëses së Departamentit të Financës dhe Kontabilitetit.
Elior Vila, 43 vjeç, Doktor Shkencash në Informatikë, aktualisht pedagog në Universitetin e Elbasanit ku mban dhe pozicionin e Përgjegjësit të Departamentit të Informatikës. Ka kryer studime të thelluara në Teknologjinë e Informacionit në Gjermani.
Sonila Daiu, 41 vjeç, Doktore Shkencash në Komunikim dhe Anglisht. Pedagoge mjaft aktive në qarqet akademike të Shqipërisë. Gjithashtu dallohet për aktivizim të shpeshtë në fushatat e Partisë Demokratike.
Klodiana Çapja kandidatja më e re. Pjesë aktive prej 13 vitesh e forumit Rinor të partisë Demokratike. Aktive gjithashtu në fushatën elektorale të 25 prillit dhe organizimeve dhe protestave të opozitës.
Këtë të shtunë do të zhvillohen zgjedhjet në 10 prej degëve të Partisë Demokratike, për kryetarët e rinj të kësaj force politike.
Pavarësisht përplasjeve të brendshme, Komisioni i Rithemelimit ka vijuar me procesin në bazë, edhe pse ndërprerja e zgjedhjeve është një prej kushteve që pala që kryesohet nga Alibeaj, ka vendosur për bashkimin.
Sot do të zgjidhen kryetarët e PD-së për Kuçovën, Skraparin, Elbasanin, Tropojën, dhe disa degë në Tiranë
