Në agimin e një dite vere të vitit 2021, shërbimet sekrete ruse zbarkuan në apartamentin e gazetarit të njohur të opozitës, Roman Badanin, duke nisur një operacion që do ta detyronte të largohej nga Rusia për të shpëtuar veten dhe bashkëpunëtorët e tij.
Ishte ora 6 e mëngjesit kur 6 deri në 8 agjentë civilë të FSB-së trokitën pa pushim në derën e tij në një lagje të Moskës, duke mbajtur një urdhër kontrolli. Për gjashtë orë, ata bastisën çdo cep të apartamentit dydhomësh, ndërsa jashtë, policia kontrollonte automjetet e Badanit dhe të bashkëshortes së tij. Më pas, gazetari u shoqërua në komisariat, ku u pyet për katër orë rresht.
Shkaku i kësaj operacioni? Publikimi i një interviste me Elizaveta Rozova, një vajzë e re që dyshohet të jetë vajza ilegale e presidentit rus, Vladimir Putin, nga lidhja e tij me Svetlana Krivonogikh. Analizat biometrike të Universitetit të Bradfordit në Mbretërinë e Bashkuar treguan 70% ngjashmëri mes vajzës dhe presidentit, ndërsa patronimi i saj “Vladimirovna” ngriti dyshime të mëtejshme.
Pas lindjes së Rozovës, Krivonogikh bleu një apartament luksoz në Monako dhe, sipas dokumenteve të “Pandora Papers”, kishte grumbulluar një pasuri mbi 78 milionë paund, duke përfshirë prona dhe një jaht privat.
Libri i Badanit dhe bashkëpunëtorit të tij, Mikhail Rubin, me titull “The Tsar Himself – How Vladimir Putin Deceived Us All”, përshkruan edhe lidhje të tjera të supozuara të Putinit, përfshirë marrëdhënien me gjimnasten Alina Kabaeva, me të cilën thuhet se ka dy fëmijë, si dhe lidhjen me studenten Alisa Kharcheva, e cila jetonte në një apartament luksoz në Moskë.
Pas publikimit të intervistës me Rozovën, shtëpia e Badanin u bastis, po ashtu edhe banesat e Rubin dhe gazetarëve të tjerë të Proekt. Më pas, Badanin dhe bashkëpunëtorët e tij u shpallën persona “të padëshiruar” nga autoritetet ruse, duke i detyruar të largohen përfundimisht nga vendi.
Sot, Proekt vijon punën nga jashtë Rusisë dhe mbetet një nga zërat më të guximshëm që sfidojnë regjimin e Vladimir Putinit, duke hetuar dhe publikuar të dhëna mbi jetën private dhe pushtetin e Kremlinit.
