Kreu i grupit parlamentar të PD-së, Gazment Bardhi, reagoi sot lidhur me takimin që ish-deputeti Ervin Salianji zhvilloi me pjesë të strukturave të PD-së në Durrës.
Bardhi theksoi se mbështet qëndrimin zyrtar të PD-së dhe të kryetarit Sali Berisha, sipas të cilit çdo mbledhje jashtë forumeve është private. Ai shtoi se PD nuk pengon askënd të shprehë lirshëm mendimin e tij dhe se institucionet e partisë nuk kufizojnë të drejtën e fjalës.
“Këto takime janë një zgjedhje personale e secilit anëtar të kryesisë ose kolegu, për t’i bërë publike ose për të marrë mendimin e demokratëve,” tha Bardhi.
“Nuk ka lidhje intervista ime me ato që bën Salianji. Mbështes qëndrimin zyrtar të PD-së dhe të kryetarit Berisha, që ka thënë se ‘çdo mbledhje jashtë forumeve është private’. PD nuk pengon askënd që të shprehë lirisht mendimin e tij apo të takohet me demokratët.
PD ka institucione që nuk i kanë kufizuar të drejtën e fjalës askujt dhe nuk kanë për të penguar askënd të shprehë lirshëm mendimin. Sikurse takime me demokratë, secili prej anëtarëve të kryesisë së PD-së dhe kolegëve bën çdo ditë zgjedhjen e tij se këto takime do t’i bëjë publike apo do të marrë realisht mendimin e demokratëve”, tha Bardhi.
I pyetur nëse këto takime vazhdojnë dhe mund të tërheqin njerëz të pakënaqur, si do ta sqaronte bazën, Bardhi u përgjigj se nuk ka keqkuptim në raport me bazën dhe se sipas tij, Shqipëria ka shumë më shumë probleme që meritojnë vëmendje sesa kjo çështje.
“Nuk ka keqkuptim te baza në raport me këto që po ndodhin në PD dhe Shqipëria ka shumë më shumë probleme që meritojnë kohë dhe vëmendje sesa kjo temë. Nuk shikoj asnjë problem të jem i vërtetë”, tha ai.
