Avokati i presidentit të Partisë së Lirisë, Ilir Meta, Genc Gjokutaj, gjatë një lidhjeje me Skype në një program televiziv, ka komentuar rreth gjendjes shëndetësore dhe ushqimit të konsumuar nga Meta në burg. Gjokutaj theksoi se Meta nuk konsumon ushqimin e burgut për shkak të terapisë që po ndjek për problemet shëndetësore dhe se ushqimi i sillet nga të afërmit.

“Meta është me ilaçe dhe nuk mund të hajë çdo lloj ushqimi për shkak të terapisë së tij,” u shpreh Gjokutaj. Ai theksoi gjithashtu se ka shumë të burgosur që nuk hanë ushqimin e burgut dhe zgjedhin të marrin ushqim nga jashtë, gjë që në rastin e Metës nuk është përjashtim. Gjokutaj shtoi se nuk ka rëndësi se kush ia dërgon ushqimin, por ky proces bëhet për të siguruar ushqim të përshtatshëm për shëndetin e tij.