Për herë të parë në histori, Giro d’Italia, një nga ngjarjet më të mëdha të çiklizmit botëror, nisi garën nga Shqipëria, duke shënuar një moment historik për sportin dhe promovimin ndërkombëtar të vendit. Edicioni i 108-të i këtij aktiviteti prestigjioz startoi me të ashtuquajturën “Nisja e Madhe”, me tre etapat e para të planifikuara të zhvillohen në territorin shqiptar.
Etapa e parë, një garë prej 160 kilometrash nga Durrësi në Tiranë, u zhvillua sot dhe u karakterizua nga ritme të larta dhe emocion deri në sekondën e fundit. Danezi Mads Pedersen doli fitues pas 3 orësh, 36 minutash dhe 14 sekondash, duke e siguruar triumfin përmes një foto-finish spektakolar, vetëm 0.04 sekonda përpara belgut Wout van Aert.
Me këtë fitore, Pedersen siguroi edhe fanellën rozë, simbolin e liderit të garës.
Pas tyre u renditën emra të njohur të çiklizmit si Orluis Aular, Francesco Busatto dhe Thomas Pidcock, të cilët dhanë një performancë dinjitoze në këtë etapë historike për Shqipërinë.
Ky event shënon jo vetëm një sukses sportiv, por edhe një mundësi të madhe për promovimin e Shqipërisë si destinacion ndërkombëtar për evente të rëndësishme sportive.
