Një ngjarje tragjike ka ndodhur në fshatin Dhivër të Bashkisë Finiq, ku është gjetur i pajetë Nikolla Kiço, 44-vjeçar.

Informacionet tregojnë se dyshohet se viktima ishte përdorues droge dhe ishte kthyer nga Greqia dy muaj më parë.

Prej 2 muajsh ishte kthyer në fshatin e lindjes ku jetonte vetëm pas humbjes së të atit pak kohë më parë. Bashkëfshatarët e hasnin duke bërë punë të lehta në kopshtet e fshatit ndërsa nga bashkia konfirmohet se sapo kishte nisur të trajtohej me ndihmë ekonomike për shkak të situatës së vështirë dhe pa të ardhura.

44-vjeçari morri pjesë dje bashkë me një grup miqsh në një përkujtimore që u mbajt në fshat. Përgjatë ceremonisë u pa të ketë konsumuar sasi të lartë alkooli që më pas mesa duket është shoqëruar me një mbidozë kokaine.

Kiço u gjend në banesë pa jetë nga të njohurit, pasi nuk ju përgjigj për orë të tëra telefonatave. Policia po heton më tej për shkaqet e humbjes së jetës.