DURRËS – Pas më shumë se dy muajsh kërkimesh dhe pasigurie, është gjetur më në fund Anxhelo Abidini, 16-vjeçari nga Korça që rezultonte i zhdukur që prej datës 2 prill. I riu u identifikua këtë të enjte nga Policia e Durrësit dhe tashmë ndodhet në ambientet e Komisariatit të Korçës, së bashku me familjarët e tij.

Zhdukja e të miturit kishte ngritur alarmin në familjen Abidini, të cilët denoncuan rastin si në polici, ashtu edhe në media, duke kërkuar ndihmën e opinionit publik. Dyshohej se Anxhelo ishte larguar pas një konflikti të hapur me autoritetet, pasi ishte përfshirë në një vjedhje në Korçë, bashkë me një 30-vjeçar që aktualisht ndodhet në burg.

Jo hera e parë që largohet

Sipas burimeve policore, Anxhelo është dënuar me shërbim prove për këtë akt, ndërsa nuk është hera e parë që ai braktis banesën. Një situatë e ngjashme kishte ndodhur edhe në dhjetor 2024, në kohën kur Prokuroria e Korçës përfundoi hetimet për rastin e parë të vjedhjes. Edhe atëherë i mituri qëndroi 5 ditë larg, për t’u kthyer më pas në shtëpi.

Aktualisht, 16-vjeçari ndodhet në gjendje të mirë shëndetësore dhe është nën kujdesin e autoriteteve dhe familjes. Policia pritet të vijojë hetimet për të kuptuar rrethanat e saktë të largimit të tij të fundit dhe për të ofruar mbështetjen e nevojshme psiko-sociale.