Policia e Kosovës ka zbuluar dhe sekuestruar një sërë armësh dhe municion në afërsi të një kodre në Banjskë, Zveçan. Në një njoftim, policia ka bërë të ditur se gjatë një patrullimi, janë gjetur dhe konfiskuar një flamur i shtetit të Serbisë, 34 gëzhoja, një karikator i armës tip AK-47, si dhe 689 fishekë kalibrash të ndryshëm.

Deri tani, nuk ka informacione për ndonjë person të arrestuar lidhur me këtë rast. Policia njofton se rasti është nën hetim për të zbuluar më shumë detaje dhe identifikuar përgjegjësit.

Eshtë e rëndësishme të përmendet se ky zbulim vjen pas një sulmi të ndodhur më 24 shtator të vitit të kaluar, ku Policia e Kosovës u sulmua nga një grup terrorist në këtë zonë, duke rezultuar në vdekjen e rreshterit Afrim Bunjaku. Situata e sigurisë në këtë zonë duket ende e ndërlikuar, dhe zbulimi i armëve dhe municionit shton shqetësimet rreth sigurisë në këtë rajon të Kosovës.