Sekretari i Përgjithshëm i Partisë Socialiste, Damian Gjiknuri, ka zbuluar strategjinë që do të ndjekin socialistët për fushatën e zgjedhjeve vendore që pritet të nisë nga java e ardhshme.

Në mbyllje të mbledhjes së Kryesisë së PS-së, Gjiknuri u shpreh se forca qeverisëse do të shmangë mitingjet e mëdha për zgjedhjet e 14 Majit, si dhe do të reduktojë në mënyrë të ndjeshme shpenzimet.

Sipas Gjiknurit, kjo strategji do të përballë forcën që synon progresin e vendit, me opozitën që sipas tij synon vetëm që të nxijë imazhin e Shqipërisë.

I pyetur nga gazetarët në lidhje me financimet e dyshuara ruse të Partisë së Lirisë, Gjiknuri tha se PS e ka bërë thirrjen e saj për organet e drejtësisë, dhe nuk do të bëjë më tej rolin e tyre.

Damian Gjiknuri:

Është një mbledhje organizative pune, PS hyn e sigurtë me një program të qartë , në funksion të rezultatit shumë të mirë që do të marrim

Ne nuk duam të bërtasim, kemi menduar një strategji që shumë shpejt do të bëhet publike, do të synojmë aktivitete më të qeta dhe më të vogla.

Rublat ruse ata janë vetë të zhytur, strategjia jonë është për ndërtimin e të ardhmes,pala tjetër ju e dini që ka një strategji tjetër që nuk përkon me atë të shqiptarëve.

Nuk është çështja jonë, ju takon organeve të drejtësisë që të zbulojnë të vërtetën, PS e ka bërë thirrjen që kjo është një çështje kombëtare, që duhet të marrë zgjidhje nga drejtësia.

Përveç faktit që PS nuk do të shpenzojë në këtë fushatë, ne duam të japim mesazhe për qytetarët, ne e shikojmë Shqipërinë si një vend që po bën progres, stabël që po rritet në të gjitha dimensionet.

Ne mbjellim një pemë ata le të çirren.