Gjykata e Apelit ka vendosur të mbajë në fuqi vendimin e Shkallës së Parë për ish-drejtorin e IT-së në Policinë e Shtetit, Ervin Muça. Apeli ka konfirmuar masën e ‘arrestit në shtëpi’ për Muçën, duke e refuzuar kërkesën e tij për të vazhduar hetimet në gjendje të lirë, duke argumentuar se nuk ka kryer shkelje të ligjit.

Muça akuzohet për kopjimin pa autorizim të të dhënave të sistemit TIMS gjatë kohës së tij si drejtor IT në Policinë e Shtetit. Prokuroria e Tiranës njoftoi marrjen në hetim të tij më datën 9 prill për veprën penale “Hyrje e paautorizuar kompjuterike”.

Pas kësaj, ai u shkarkua nga detyra e tij nga drejtori i përgjithshëm, Muhamet Rrumbullaku. Për këtë çështje, është ngritur një Komision Hetimor Parlamentar, në të cilën dëshmoi edhe Muça pa praninë e kamerave. Ai u thirr në SPAK për të dëshmuar më 12 prill, ku para mediave deklaroi se është i pafajshëm, pasi sipas tij ka vetëm spekulime mediatike dhe ka kryer vetëm detyrën e tij.