Gjykata e Këlnit në Gjermani ka vendosur masa të rrepta për të parandaluar mashtrimet me shumë të kërkuarat “Çokollata e Dubait”. Trendi global i këtyre çokollatave, të cilat janë kthyer në sensacion në tregjet ndërkombëtare, ka çuar në krijimin e produkteve të tjera që përdorin emrin pa qenë të prodhuara në Emiratet e Bashkuara Arabe.

Sipas vendimit të gjykatës, vetëm çokollatat që importohen nga Dubai dhe mbajnë emrin zyrtar “Çokollata e Dubait” do të lejohen të përdorin këtë emër. Gjykata argumentoi se përdorimi i emrit për produkte që nuk janë prodhuar në Dubai mund të mashtrojë konsumatorët.

Dënime të rënda për shkelësit

Tregtarët që shkelin këtë vendim do të përballen me masa të ashpra: deri në 6 muaj burg ose gjobë prej 250 mijë euro. Vendimi synon të mbrojë autenticitetin e produktit dhe të parandalojë spekulimet në treg.

Kjo masë shënon një hap të rëndësishëm në rregullimin e tregut të çokollatave të Dubait, të cilat kanë fituar popullaritet të jashtëzakonshëm për cilësinë dhe origjinën e tyre unike.