Pas kërkesës së dorëzuar nga avokatët e Ervin Salianjit, Gjykata e Lartë ka hedhur shortin dhe ka caktuar gjyqtarin Sokol Binaj për të shqyrtuar çështjen e tij. Gazetarja Anila Hoxha raporton se ende nuk është përcaktuar data për shqyrtimin e kësaj çështjeje, ndërkohë që Gjykata e Apelit nuk e ka zbardhur ende vendimin përmes të cilit Salianji u dënua me një vit burg për akuzën e kallëzimit të rremë.

Kërkesa e paraqitur nga avokatët ka si objekt **pezullimin e ekzekutimit të vendimit** të Gjykatës së Apelit të Juridiksionit të Përgjithshëm, me nr. 30-2024-6822, datë 26 shtator 2024. Në këtë kërkesë, avokatët e ish-deputetit të Partisë Demokratike argumentojnë se vendimi duhet të pezullohet derisa të shqyrtohen më tej rrethanat dhe arsyet e dënimit.

Avokatët theksojnë se **deputeti Salianji ka vepruar në kuadrin e funksionit të tij politik** dhe se deklaratat e tij duhet të mbrohen nga neni 10 i Konventës Europiane për të Drejtat e Njeriut, që siguron lirinë e shprehjes. Ata argumentojnë se vendimi i Apelit është ekzekutuar vetëm përmes një dispozitivi të shkurtuar, pa zbardhjen e plotë të arsyetimit ligjor, një procedurë që ata pretendojnë se është e paqenë në bazë të Kodit të Procedurës Penale dhe ligjit për ekzekutimin e vendimeve penale.

Ndërkohë, Salianji ndodhet në burgun e Fierit, ndërsa çështja po vazhdon të ndjekë procedurat e saj ligjore.