Një vendim i Gjykata e Lartë e Mbretërisë së Bashkuar ka nxitur debat të fortë politik, pasi 70 emigrantë që kanë hyrë në Britani përmes kalimeve të paligjshme nëpër La Mansh do të përfitojnë kompensim prej 6,600 paund secili për sekuestrimin e telefonave celularë nga autoritetet e emigracionit.

Sipas raportimeve, deri tani shuma totale e kompensimit arrin në rreth gjysmë milioni paund, ndërsa mbi 1,300 persona të tjerë janë në pritje. Nuk ka ende një shifër të saktë për numrin total të emigrantëve të cilëve u janë marrë pajisjet elektronike.

Pse u sekuestruan telefonat?

Autoritetet e Home Office konfiskonin celularët për t’i ç’koduar dhe për të mbledhur të dhëna me qëllim luftimin e rrjeteve të trafikimit. Sipas gjykatës, gjatë periudhës prill–nëntor 2020, kjo praktikë u zbatua në mënyrë të paligjshme, me pretendime se emigrantët u vunë nën presion për të dorëzuar kodet e aksesit. Të dhënat e nxjerra përdoreshin në një databazë të njohur si “Project Sunshine”.

Kalimet me gomone nëpër La Mansh arritën kulmin në vitin 2022, me rreth 40 mijë persona në vit. Shumë prej tyre u dërguan në qendrën e pritjes në Manston, pranë Doverit.

Reagime politike

Vendimi është cilësuar “farsë” nga kritikët. Ish-ministri i Emigracionit, Robert Jenrick, tashmë pjesë e partisë Reform UK të drejtuar nga Nigel Farage, deklaroi se nëse partia e tij vjen në pushtet do të ndalojë zbatimin e vendimeve të gjykatave evropiane në çështje të tilla.

Nga ana tjetër, një zëdhënës i Home Office tha se kompensimi lidhet me politikën e ndjekur nga qeveria e mëparshme konservatore dhe se tashmë ekziston një ligj i ri që e bën sekuestrimin e pajisjeve elektronike të ligjshëm në rrethana të caktuara.

Çështja pritet të mbetet në qendër të debatit publik, mes argumenteve për sigurinë kombëtare dhe respektimin e të drejtave individuale.