Tiranë – Kolegji Penal i Gjykatës së Lartë ka vendosur të mos pranojë kërkesën e kompanisë së ndërtimit “Agi Kons”, në pronësi të biznesmenit Gentian Sula, për heqjen e sekuestros së një apartamenti në zonën e “Kodrës së Diellit” në Tiranë, që dyshohet si pasuri e fshehur e kryebashkiakut të arrestuar, Erion Veliaj. Vendimi u shpall të enjten, më 22 janar 2026, duke lënë në fuqi vendimin e Gjykatës së Posaçme të Apelit, nr.38, datë 17 qershor 2025.
Komisioni i Lartë theksoi se apartamenti në fjalë ndodhet një kat mbi banesën zyrtare të Veliajt dhe bashkëshortes së tij, Ajola Xoxa, dhe se Prokuroria e Posaçme ka krijuar dyshime të arsyeshme se pasuria është “de fakto” në pronësi të çiftit Veliaj-Xoxa. Sipas SPAK, apartamenti dyshohet të jetë produkt i një marrëdhënieje korruptive mes Veliajt dhe ndërtuesit Gent Sula, dhe për këtë arsye konsiderohet pasuri e fshehur.
Në kërkesën e saj, “Agi Kons” pretendonte se apartamenti i takonte kompanisë si ndërtuese e komplekseve rezidenciale dhe se Veliajt dhe bashkëshortja e tij nuk kishin të drejtë pronësore mbi të. Megjithatë, hetimet e Prokurorisë kanë evidentuar përpjekje për të mbuluar pasurinë e dyshuar të kryebashkiakut, duke e futur atë nën emër të ndërtuesit.
Sipas të dhënave hetimore, apartamenti zyrtar i çiftit Xoxa-Veliaj ndodhet në katin e katërt të një godine pesëkatëshe dhe është i deklaruar në formularët e pasurisë pranë ILDKPKI. Apartamenti i dyshuar si i fshehur ndodhet në katin e pestë të së njëjtës godinë dhe deri në vitin 2019, aty ka jetuar aktori i kabaresë “Portokalli”, Gazmend Paja, i cili më pas u zhvendos në një banesë tjetër, sipas marrëveshjes me ndërtuesin Sula.
Ky vendim vjen në kuadër të hetimeve për korrupsion dhe pastrim parash, duke theksuar se Gjykata e Lartë e ka konsideruar të arsyeshme sekuestrimin e apartamentit dhe ka refuzuar kërkesën e kompanisë për ta shfuqizuar atë.
