Gjykata e Tiranës njeh Lulzim Bashën në krye të Partisë Demokratike. Kjo është konfirmuar përmes një vërtetimi që është lëshuar dje nga Gjykata e Tiranës. Sigurohet vërtetimi që ka lëshuar Gjykata e Tiranës, në të cilin thuhet se kryetar i PD-së është Lulzim Basha.
Shkresa si më poshtë:
“Vërtetojmë se në Regjistrin e Partive Politike pranë Gjykatës së Rrethit Gjyqësor Tiranë, rezulton se me urdhër nr. 12, datë 19.12.1990 të ministrit të Drejtësisë, është miratuar krijimi i ‘Partisë Demokratike’, me iniciale ‘PD’ ose ‘PDSH’. Kryetar i Partisë është z.Lulzim Basha. E lëshojmë këtë vërtetim në përgjigje të kërkesës së subjektit të interesuar”, thuhet në shkresën e lëshuar nga Gjykata që mban datën 24.01. 2022.
Ndërkohë, mbrëmjen djeshme rreth orës 20:00 përfaqësuesi i PD-së në KQZ, Marash Logu, depozitoi në Komisionin Qendror të Zgjedhjeve dokumentet për t’u regjistruar në zgjedhje dhe kandidatët për anëtarë në KZAZ. Ndërkohë, më herët gjatë ditës së djeshme Partia Socialiste depozitoi në KQZ dokumentacionin për regjistrimin e PSSH për zgjedhjet e pjesshme vendore të datës 6 mars 2022, për kryetarë të bashkive. Dokumentacioni është dërguar nga sekretari i Përgjithshëm i PS-së, Damian Gjiknuri.
Dokumenti është bërë publik për mediat nga vetë Komisioni Qendror i Zgjedhjeve. Ndërkohë, pas regjistrimit Partia Socialiste dorëzoi në Komisionin Qendror të Zgjedhjeve propozimet e saj për anëtarët e KZAZ-ve në zgjedhjet e pjesshme lokale, që pritet të mbahen më 6 mars. Dokumenti mban firmën e përfaqësuesit ligjor të socialistëve në KQZ, Eridian Salianji.
