Gjykata e Tiranës ka firmosur një urdhër për sekuestro preventive të 6 apartamenteve dhe 6 automjeteve luksoze, të cilat dyshohet se janë blerë me para të pastruar nga aktiviteti kriminal. Në qendër të hetimeve është Irma Hasani, një punonjëse e Shërbimeve Qeveritare, e cila dyshohet se ka pastruar paratë e vëllait të saj, Oltion Hasani, i dënuar për drogë në Angli. Blerjet e pasurive janë realizuar në një periudhë dyvjeçare, nga viti 2022 deri në 2024.

Policia e Tiranës njoftoi se pasuria e sekuestruar, në emër të Irma Hasanit, ka një vlerë prej 750 mijë eurosh. Prokuroria e Tiranës kishte kërkuar sekuestro në bazë të provave që tregojnë se Irma Hasani është punësuar në ‘Drejtorinë e Shërbimeve Qeveritare’ që nga viti 2011, me një pagë bruto prej 61.000 lekësh, dhe nuk mund të justifikonte blerjen e pasurive të luajtshme dhe të paluajtshme.

Verifikimet e mëtejshme zbuluan se vëllai i saj, Oltion Hasani, ishte i dënuar në Britaninë e Madhe për veprime penale në fushën e narkotikëve. Operacioni i koduar “Immediate” rezultoi me sekuestrimin e pasurive që dyshohet se rrjedhin nga veprimtaria kriminale e 37-vjeçarit.

Sipas njoftimit të policisë, gjatë hetimeve janë verifikuar transferta bankare në llogarinë e 41-vjeçares, ku brenda një muaji ishin derdhur 180 mijë euro cash. Këto fonde janë përdorur për blerjen e një apartamenti, me 160 mijë euro të transferuara nga Irma Hasani në llogarinë e noterit.

Hetuesit kanë vërtetuar se kontratat noteriale për blerjet e pasurive të paluajtshme dhe automjeteve të shtrenjta ishin nënshkruar kryesisht në periudhën pas arrestimit të Oltion Hasanit për veprat penale. Ndërkohë, organi i akuzës ka njoftuar se puna për gjurmimin dhe identifikimin e pasurive të tjera që kanë burimin nga aktiviteti kriminal vazhdon.