Gjykata e Vlorës ka vendosur lirimin nga burgu të 27-vjeçarit Krenar Velaj nga Orikumi, duke i caktuar masën e sigurisë “detyrim paraqitje”, pas incidentit të rëndë që ndodhi fundjavën e kaluar në plazhin e Gjipesë, ku u plagos një turist gjerman.

Ngjarja ndodhi të dielën, rreth orës 13:40, kur Velaj, duke drejtuar një gomone, plagosi rëndë me helikat e mjetit lundrues shtetasin gjerman D. S., 46 vjeç, i cili po bënte zhytje në afërsi të gomones. Turisti pësoi dëmtime të rënda, përfshirë prerje të gjymtyrëve të poshtëm dhe plagë në shpatull, duke alarmuar pushuesit dhe strukturat e emergjencës.

Fillimisht i plagosuri u transportua në spitalin e Himarës, e më pas, për shkak të gjendjes së rënduar, u dërgua me helikopter drejt Spitalit të Traumës në Tiranë për trajtim të specializuar.

Sipas policisë, mjeti lundrues kishte dokumentacion të rregullt dhe ndodhej jashtë zonës së sigurisë për notuesit, duke respektuar distancën e përcaktuar nga tapat që kufizojnë zonën e larjes. Po ashtu, drejtuesi i gomones ishte personi i parë që i dha ndihmën e parë turistit dhe e nxori në breg të detit.

Pavarësisht kësaj, Velaj u arrestua dhe u akuzua për veprën penale “Plagosje e rëndë me dashje”, por pas shqyrtimit të rrethanave të ngjarjes, Gjykata vendosi të mos e mbajë më në paraburgim.

Ngjarja ka shtuar shqetësimin për sigurinë në plazhe dhe mbikëqyrjen e mjeteve lundruese, sidomos në zonat ku ka fluks turistësh dhe aktivitete të ndryshme ujore. Autoritetet janë thirrur të forcojnë kontrollet dhe të rishikojnë masat mbrojtëse, për të shmangur tragjedi të ngjashme gjatë sezonit turistik.