Shqipëria është renditur në vendin e parë në botë për qëndrueshmëri në sektorin energjetik, sipas raportit më të fundit të publikuar nga World Economic Forum (WEF). Në këtë renditje prestigjioze, vendi ynë lë pas fuqi të njohura energjetike si Franca, Suedia dhe Zvicra.

Renditja bazohet në tre shtylla kryesore që përbëjnë boshtin e zhvillimit energjetik të një vendi: siguria energjetike, qëndrueshmëria dhe zhvillimi ekonomik i qëndrueshëm.

Në kolonën e qëndrueshmërisë, ku matet ndikimi afatgjatë i burimeve dhe politikave energjetike në mjedis dhe klimë, Shqipëria është në krye, duke reflektuar orientimin e saj të fortë drejt energjeve të rinovueshme, veçanërisht hidroenergjisë, që përbën shumicën dërrmuese të prodhimit kombëtar.

Reagimi i qeverisë shqiptare

Zëvendëskryeministrja dhe Ministrja e Infrastrukturës dhe Energjisë, Belinda Balluku, e cilësoi këtë sukses si “fryt i punës së palodhur dhe vizionit të qartë të Qeverisë Shqiptare dhe Kryeministrit Edi Rama”.

“Krenari të shohim frytet e punës së skuadrës sonë të vlerësohen ndërkombëtarisht. Shqipëria në vend të parë për qëndrueshmëri energjetike sipas World Economic Forum! Një dëshmi tjetër e ambicies sonë për ta kthyer vendin në një pol energjetik rajonal dhe eksportues neto të energjisë,” shkruan Balluku në rrjetet sociale.

Ajo shtoi se ky vlerësim na motivon për të ecur përpara me projektet transformuese në sektorin energjetik, duke e parë energjinë si një aset strategjik për të ardhmen e vendit, në një kohë kur sfidat gjeopolitike globale kanë rritur interesin për qëndrueshmërinë dhe pavarësinë energjetike.

Shqipëria si model rajonal

Ekspertët vlerësojnë se modeli i energjisë së pastër të Shqipërisë dhe potenciali i saj i lartë për zhvillimin e energjisë diellore dhe asaj me erë, i japin vendit një avantazh të qëndrueshëm në planin afatgjatë. Tashmë, synimi i shpallur është që Shqipëria të bëhet eksportuese neto e energjisë deri në vitin 2030, duke u kthyer në një faktor kyç për sigurinë energjetike të Ballkanit dhe më gjerë.

Renditja e WEF është një tjetër njohje ndërkombëtare për përparimin e Shqipërisë në fushën e energjisë dhe një sinjal pozitiv për investitorët dhe partnerët ndërkombëtarë.