Gjykata Kushtetuese ka botuar në Fletoren Zyrtare vendimin e marrë më 12 dhjetor, duke hequr pezullimin nga detyra të Belinda Ballukut dhe duke e rikthyer atë në postin e zëvendëskryeministres dhe ministres së Infrastrukturës dhe Energjisë, deri në 22 janar.

Vendimi u miratua me pesë vota pro nga gjyqtarët Sonila Bejtja, Gent Ibrahimi, Sandër Beci, Marjana Selimi dhe Fiona Papajorgji, ndërsa kundër votuan Ilir Toska, Marsida Xhaferllari dhe Asim Vokshi. Ky zhvillim vjen pas kërkesës së kryeministrit Edi Rama për shfuqizimin e pezullimit të vendosur më herët ndaj Ballukut nga Gjykata e Posaçme.

Sipas arsyetimit të Gjykatës Kushtetuese, pezullimi i masës së ndalim-detyrës ndaj një ministri ose zëvendëskryeministri “mund të ndikojë drejtpërdrejt në ushtrimin e kompetencave të qeverisë, duke sjellë vakum funksional”, duke rrezikuar interesat shtetërore.

Në vendim theksohet se zbatimi i masave të GJKKO-së dhe vijimi i ndalimit për Ballukun krijonte rrezik real për funksionimin normal të ekzekutivit:

“Zbatimi i vendimeve nr.118, datë 19.11.2025 dhe nr.120, datë 22.11.2025… rrezikon të sjellë pasoja që prekin interesat shtetërorë gjatë ushtrimit e kompetencave kushtetuese të pushtetit ekzekutiv në drejtim të përcaktimit të politikave të përgjithshme shtetërore”, – thuhet në vendim.

Me këtë vendim, Belinda Balluku rikthehet zyrtarisht në detyrë, ndërsa procesi ndaj saj vijon të jetë në shqyrtim nga gjykatat përkatëse.