Një shqiptar është arrestuar nga Guardia di Finanza në Padova, Itali, pas zbulimit të një laboratori modern të përpunimit të heroinës, ku u sekuestruan 60 kilogramë drogë, pajisje profesionale dhe 25 mijë euro cash. Mediat italiane raportojnë se shqiptari 44-vjeçar, i dyshuar si “kimisti” i organizatës, është vënë tashmë në dispozicion të drejtësisë.

Operacioni nisi gjatë një kontrolli rutinë në zonën e Guizzës, ku oficerët ndaluan një shtetas që po lëvizte në mënyrë të dyshimtë. Dokumentet që ai paraqiti rezultuan të ishin të falsifikuara, dhe nervozizmi i tij bëri që policia të vijonte kontrollin deri në banesën e të dyshuarit.

Në shtëpinë e shqiptarit, Guardia di Finanza zbuloi një “rafineri droge” me standarde të larta, ku përveç heroinës së pastër, u gjetën mjetet për përzierjen, përgatitjen dhe paketimin e saj. Sipas hetuesve, nëse droga do të përzihej sipas metodës një me tre, sasia përfundimtare do të shkonte deri në 200 kilogramë, me një vlerë mbi 1 milion euro në tregun e zi.

I arrestuari ndodhet në burgun e Padovës, ndërsa hetimet vijojnë për të zbuluar rrjetin dhe destinacionin e drogës. Autoritetet italiane dyshojnë për një strukturë të organizuar trafiku ndërkombëtar, ku 44-vjeçari shqiptar luante rolin e specialistit teknik të përpunimit.