Një 43-vjeçar është arrestuar në flagrancë nga Policia e Shtetit në Vlorë, pasi dyshohet se ka ushtruar dhunë fizike ndaj një punonjësi të Policisë Bashkiake.

Ngjarja ka ndodhur rreth orës 10:55 në rrugën “Mitaq Salati”, në lagjen “15 Tetori”. Sipas policisë, shtetasi M. L., 43 vjeç, banues në Vlorë, ka kundërshtuar vendosjen e një mase administrative për parkim të gabuar ndaj automjetit të tij.

Gjatë konfliktit, ai dyshohet se ka goditur punonjësin e Policisë Bashkiake, shtetasin S. N., 28 vjeç.

Specialistët e Seksionit për Hetimin e Krimeve në Komisariatin e Policisë Vlorë kanë kryer arrestimin e tij për veprën penale “Goditja për shkak të detyrës”, ndërsa materialet procedurale i janë referuar Prokurorisë për veprime të mëtejshme.