Një prej të kërkuarve nga SPAK, nën dyshimin e përfshirjes në trafik armësh nga Shqipëria drejt Britanisë së Madhe, ka humbur betejën e bllokimit të ekstradimit.

Sipas dokumenteve të Westminster Magistrate Court, të siguruara nga gazetarët, gjykata ka dhënë dritën jeshile për ekstradimin e Alban Gjidiaj drejt Shqipërisë, pas bashkëpunimit juridik mes CPS, Prokurorisë Mbretërore Britanike dhe Drejtorisë për Marrëdhënie me Jashtë në Ministrinë e Drejtësisë në Tiranë.

Vendimi i gjykatës është dërguar tashmë te Sekretarja e Shtetit për Punët e Brendshme, e cila do të firmosë urdhrin final të ekstradimit.

Ndërkohë, Gjidiaj do të vijojë të qëndrojë në liri me kusht, pas vendosjes së një garancie prej 5 mijë sterlinash, monitorim elektronik dhe paraqitje çdo të premte në rajonin policor Colindale, Londër.

Interpol Tirana dhe homologët britanikë lokalizuan Alban Gjidiaj vitin e kaluar në Londër, ku ishte shpallur i kërkuar me urdhër-arrest të lëshuar nga SPAK për përfshirje në një komplot ndërkombëtar për trafik armësh. Ai dyshohet se ishte pjesë e një grupi kriminal të strukturuar që kishte planifikuar transportin e tetë armëve të zjarrit dhe një sasie të konsiderueshme municioni nga porti i Durrësit drejt bandave në Britaninë e Madhe.