Policia ka zbardhur detaje të reja nga operacioni që goditi një organizatë kriminale, e cila vidhte veshje nga dyqanet në Athinë dhe më pas i kontrabandonte dhe i shiste në Tiranë.

Sipas hetimeve, grupi ishte i ndarë në dy njësi: një skuadër në Greqi që kryente vjedhjet dhe një tjetër në Shqipëri që merrej me importin dhe shitjen e mallrave. Liderja e organizatës është identifikuar si Oliota Lama, 54 vjeçe, ndërsa disa anëtarë të tjerë, pjesë e familjes së saj, mbeten të paidentifikuar publikisht.

Veshjet e vjedhura ruheshin fillimisht në magazina pranë Athinës, ku hiqeshin etiketat e sigurisë me pajisje speciale, dhe më pas transportoheshin me autobus drejt Tiranës. Në Shqipëri, grupi menaxhonte një dyqan rrobash ku mallrat e vjedhura reklamoheshin dhe shiteshin edhe në rrjetet sociale.

Në kuadër të operacionit, policia arrestoi 8 persona, ndërsa 3 të tjerë janë shpallur në kërkim. Gjatë aksionit u sekuestruan rreth 71,420 euro cash, një sasi e konsiderueshme veshjesh të vjedhura, pajisje elektronike dhe magnetë anti-vjedhje.

Të arrestuarit akuzohen për “themelim dhe pjesëmarrje në organizatë kriminale”, vjedhje me bashkëpunim, pastrim parash dhe shpërndarje të fitimeve kriminale.