Rusët janë tërhequr nga shumë zona të Kievit, por ata kanë lënë plagë të rënda në jetët e njerëzve që ndoshta nuk do të mund të shërohen nga trauma. BBC ka marrë dëshmitë e dorës së parë dhe gjeti prova të grave ukrainase që u përdhunuan nga ushtarët pushtues.

Në një lagje të qetë periferike, në Kievin perëndimor, BBC intervistoi Anën, e cila është 50 vjeçare, emri i së cilës është ndërruar për shkak të mbrojtjes së identitetit të saj.

Ana tha se më 7 mars ajo oshte në shtëpi me burrin e saj kur një ushtar i huaj hyri vrullshëm.

“Nën kërcënimin e armës, ai më mori dhe më dërgoi në një shtëpi afër. Ai më urdhëroi: ‘Hiqi rrobat ose do t’ju qëlloj’. Ai vazhdoi të më kërcënonte nëse nuk do të bëja siç më thoshte ai. Pastaj, filloi të më përdhunonte”, rrëfen ajo.

Ana e përshkroi përdhunuesin e saj si të ri, të hollë, luftëtar çeçen aleat me Rusinë.

“Derisa ai po më përdhunonte mua, katër ushtarë të tjerë hynë. Mendova se e pata, por ata e morën dhe e larguan. Nuk e pashë më kurrë”, tha ajo. Ajo beson se u shpëtua nga një njësi e veçantë ushtarake ruse”.

Ana u kthye prapë në shtëpi dhe gjeti burrin e saj. Ai ishte qëlluar në abdomen.

“Ai tentoi të vraponte pas meje që të më shpëtonte, por ai ishte qëlluar nga plumbat”, tha ajo. Ajo nuk mund ta dërgonte burrin e saj në spital për shkak të luftimeve. Ai vdiq dy ditë më pas nga plagët e marra.

Ana i tregoi ekipit të BBC edhe vendin kur e ka varrosur burrin e saj në kopshtin e pasmë të shtëpisë me një kryq të drurit mbi të.