Ministrat e Jashtëm të Greqisë dhe Turqisë ranë dakord të premten për të vazhduar përmirësimin e marrëdhënieve mes dy vendeve, me fokus në nxitjen e tregtisë dhe gjetjen e një gjuhe të përbashkët për zgjidhjen e mosmarrëveshjeve të tyre të gjata territoriale. Ministri i Jashtëm grek, George Gerapetritis, theksoi se ata konfirmuan vullnetin e tyre për të ruajtur klimën pozitive që ata kanë arritur të ndërtojnë gjatë këtyre muajve.

Nga ana tjetër, homologu i tij turk, Hakan Fidan, shprehu besimin se mosmarrëveshjet midis Greqisë dhe Turqisë mund të zgjidhen në mënyrë të ndërsjellë dhe në përputhje me ligjin ndërkombëtar. “Unë besoj se ne mund t’i zgjidhim mosmarrëveshjet tona me fqinjin tonë Greqinë me respekt të ndërsjellë dhe në bazë të ligjit ndërkombëtar,” tha ai.

Dhjetorin e kaluar, Greqia dhe Turqia rifilluan bisedimet e nivelit të lartë për të ulur tensionet mes dy vendeve, pas një periudhe të gjatë tensioni, e cila u shënua nga mosmarrëveshjet mbi migrimin, eksplorimin e energjisë në Egje dhe çështjet e sovranitetit territorial. Ky proces ka nisur pas vizitës historike të presidentit turk, Rexhep Tajip Erdogan, në Athinë për herë të parë në gjashtë vjet.

Në atë periudhë, Erdogan kishte vënë në dyshim traktatet shekullore që përcaktojnë kufijtë dhe sovranitetin, duke bërë madje kërcënime për pushtimin e disa ishujve grekë të Egjeut.