Autoriteti i Pavarur i të Ardhurave Publike të Greqisë (AADE) ka publikuar bilancin e kontrolleve doganore për gjysmën e parë të vitit 2026, ku janë zbuluar raste të shumta të transportit të paligjshëm të valutës, duhanit, mallrave të falsifikuara dhe produkteve të tjera të ndaluara.

Kontrollet janë zhvilluar në aeroporte, porte, pika kufitare tokësore, automjete, bagazhe, pako postare dhe ambiente magazinimi, duke përdorur pajisje me rreze X dhe qen të trajnuar për zbulimin e drogës, armëve dhe mallrave kontrabandë.

Gjatë operacioneve janë sekuestruar mbi 2 milionë euro, si dhe shuma të tjera në dollarë, paund britanikë, lira turke, dinarë, lekë dhe monedha të ndryshme. Autoritetet konfiskuan gjithashtu 60 monedha ari dhe gjashtë shufra ari me peshë totale 190 gramë.

Rastet më të mëdha të valutës së padeklaruar u zbuluan në pikat kufitare të Evzonit dhe Kipit, ku në secilin rast u gjetën mbi 700 mijë euro.

Në Aeroportin Ndërkombëtar të Athinës, kontrollet zbuluan para të fshehura në bagazhet e pasagjerëve që mbërrinin nga destinacione të ndryshme ndërkombëtare, përfshirë Stambollin, Dohën, Tiranën dhe Nju Jorkun.

Një tjetër fokus i kontrolleve ishte kontrabanda e duhanit. Sipas AADE, janë sekuestruar më shumë se 4 milionë cigare, rreth 70 kilogramë duhan, si dhe mijëra puro dhe produkte të duhanit të ngrohur.

Vetëm në aeroportin “Eleftherios Venizelos” të Athinës, 17 pasagjerë u kapën me rreth 698 mijë cigare në bagazhe, ndërsa sasi të tjera u zbuluan në çanta të braktisura.

Kontrollet nxorën në pah edhe një treg të gjerë të produkteve të falsifikuara. Doganat greke konfiskuan mbi 31 mijë artikuj të falsifikuar, përfshirë veshje, këpucë, çanta, ora dhe aksesorë me marka të kopjuara.

Gjatë operacioneve u zbuluan gjithashtu armë të paligjshme, telefona celularë, bizhuteri ari, lëndë narkotike, pesticide të ndaluara dhe dy papagaj ekzotikë.

Një rast i veçantë ishte sekuestrimi i një pjese trungu të fosilizuar nga Pylli i Fosilizuar i Lesbosit, me vlerë të përllogaritur mbi 7 mijë euro.

AADE ka bërë të ditur se kontrollet do të vijojnë edhe në muajt e ardhshëm, me fokus parandalimin e kontrabandës, trafikimit të paligjshëm dhe shmangies së detyrimeve doganore në kufijtë e Greqisë.