Anëtari i kryesisë së Partisë Demokratike, Grigels Muçollari, ngriti shqetësime të forta lidhur me situatën e sigurisë ushqimore në Shqipëri. Ai theksoi se, përkundër denoncimeve dhe shqetësimeve të ngritura, nuk ka asnjë përmirësim dhe se produktet ushqimore të ndaluara në vendet e Bashkimit Europian vazhdojnë të futen në Shqipëri.

Muçollari theksoi se së fundmi, ngarkesa të mëdha mandarinash me origjinë shqiptare janë kthyer nga disa vende të BE-së, përfshirë Kroacinë, për shkak të niveleve të larta të pesticideve të dëmshme për shëndetin e njeriut. “Kjo ndodh sepse fermerët tanë nuk mbështeten, nuk monitorohen, dhe AKU (Agjencia Kombëtare e Ushqimit) nuk kryen funksionet e saj,” tha ai. Sipas Muçollarit, këto produkte, që kanë nivele të rrezikshme pesticide, janë ende në tregun shqiptar dhe po konsumohen nga qytetarët, sepse asnjë autoritet nuk ka ndërhyrë në kohë.

Muçollari gjithashtu akuzoi ministrat dhe qeverinë për moskryerjen e detyrave të tyre. Ai theksoi se pesticidet dhe plehrat kimike që u ofrohen fermerëve nuk kontrollohen për përmbajtjen e tyre reale dhe shpesh fermerët, pavarësisht se ndjekin protokollet e duhura, përballen me kthimin e produkteve të tyre nga kufijtë e BE-së për shkak të përmbajtjes së tepërt të substancave të dëmshme.

Për të ilustruar më tej këtë situatë, Muçollari solli një tjetër rast të shqetësuar, atë të kremrave të orizit biologjik, një produkt që është futur në treg dhe përdoret si ushqim për foshnjat, por që ka dyshime për sigurinë e tij.

“Institucionet shqiptare janë inaktive dhe nuk mund të sigurojnë mbrojtjen e qytetarëve nga këto kërcënime,” u shpreh ai, duke kërkuar ndërhyrje të menjëhershme dhe përmirësime në këtë sektor të rëndësishëm.