Një seri grabitjesh të ndodhura në fillim të shtatorit 2025 në komunën Hochdorf ka çuar në zbulimin e një grupi kriminal që vepronte në shkallë kombëtare në Zvicër. Policia e Luzernës arriti të arrestojë të dyshuarit, ndërsa në automjetin e tyre u sekuestruan sende që dyshohet se janë të vjedhura, si edhe mjete për thyerje, raporton Blick.

Pas arrestimeve, Prokuroria për Krime të Veçanta, në bashkëpunim me Policinë e Luzernës, zhvilloi hetime të thelluara, nga të cilat rezultoi se personat e ndaluar janë pjesë e një grupi kriminal të organizuar. Të dyshuarit, gjashtë gjithsej, janë shtetas nga Kosova, të moshës 26 deri në 57 vjeç.

Sipas autoriteteve, ata akuzohen se, në përbërje të ndryshme, kanë kryer 161 grabitje në të paktën 11 kantone të Zvicrës. Objektiv kryesor i vjedhjeve kanë qenë bizneset dhe ndërmarrjet tregtare, ku synimi ishte kryesisht marrja e parave.

Vlera e përfitimeve nga aktiviteti kriminal llogaritet rreth 590 mijë franga zvicerane, ndërsa dëmi i përgjithshëm material arrin në rreth 705 mijë franga.

Hetimet ndaj autorëve të dyshuar vijojnë ende pranë Prokurorisë për Krime të Veçanta. Autoritetet theksojnë se për të gjithë të pandehurit zbatohet parimi i prezumimit të pafajësisë, deri në përfundimin e formës së prerë të procedurave gjyqësore.