Hamasi ka deklaruar se çdo marrëveshje armëpushimi në Gaza duhet të përfshijë tërheqjen e plotë të forcave izraelite nga territori i trazuar. Ndërkohë, sot në Lindjen e Mesme mbahet një takim i përbashkët i Ministrave të Jashtëm të Francës dhe Britanisë së Madhe, me qëllim gjetjen e një zgjidhjeje diplomatike.

Numri i viktimave në Gaza vazhdon të rritet, duke kaluar 40 mijë që nga nisja e luftës më 7 tetor 2023. Mediat dhe burime të pavarura kanë spekuluar se Irani mund të kryejë një sulm të mundshëm së shpejti, megjithatë ende nuk ka një datë të saktë për këtë.

Në të njëjtën kohë, Izraeli vazhdon të kryejë operacione ushtarake, duke mos treguar asnjë shenjë tërheqjeje. Në një incident të fundit, ekstremistët sulmuan në Bregun Perëndimor palestinez, duke vrarë një person, ndërsa bombardimet në kampet e refugjatëve Jabalia dhe Nuseirat shkaktuan të paktën tetë viktima.

Shtëpia e Bardhë dënoi dhunën e kolonëve izraelitë kundër palestinezëve në Bregun Perëndimor, duke e cilësuar atë të papranueshme dhe duke kërkuar që autoritetet izraelite të ndërhyjnë për të mbrojtur të gjitha komunitetet.

Në Katar, negociatat për një armëpushim në Gaza janë rinisur sot, ndërsa përpjekjet e ndërmjetësuesve nga Katari, Egjipti dhe SHBA po vazhdojnë për të arritur një marrëveshje që do të mundësojë lirimin e pengjeve dhe hyrjen e ndihmave humanitare në Gaza.

Ndërkohë, Ministri izraelit i Mbrojtjes, Yoav Gallant, dënoi dhunën e ekstremistëve në Bregun Perëndimor, duke theksuar mbështetjen e tij për forcat izraelite në trajtimin e situatës me ashpërsi.