Bashkëpunimi më i ri mes dy emrave të njohur të skenës bullgare, Azis dhe Tsvetelina Yaneva, ka tërhequr vëmendje edhe në publikun shqiptar. Dyshja kanë publikuar këngën “Havte”, një projekt me ritme tipike ballkanike, i shoqëruar me një videoklip të realizuar në ambientet e një aeroporti.

Megjithatë, përtej estetikës vizuale dhe energjisë së këngës, ajo që ka nxitur menjëherë diskutime është linja melodike e projektit. Shumë dëgjues shqiptarë kanë vënë re një ngjashmëri të fortë mes “Havte” dhe hitit të njohur “Valle Kosovare”, këngë e identifikuar gjerësisht me emrin e artistit të ndjerë Shpat Kasapi.

Sipas reagimeve në rrjete sociale, “melodia e refrenit duket pothuajse identike me atë të ‘Valles Kosovare’”, duke ngritur pikëpyetje mbi origjinalitetin e këngës së re. Debati është intensifikuar edhe për faktin se “Valle Kosovare” së fundmi po përjetonte një rikthim të fuqishëm në arenën ndërkombëtare.

Kënga shqiptare u kthye në trend në TikTok, duke u përdorur në miliona video nga përdorues të ndryshëm, përfshirë edhe të huaj. Viraliteti i saj e riktheu në qendër të vëmendjes një nga hitet më të dashura të muzikës shqiptare.

Ndërkohë, në kreditet zyrtare të “Havte”, e prodhuar nga Costi, nuk figuron asnjë referencë për autorët e “Valles Kosovare” apo për vetë Shpat Kasapin, çka ka shtuar edhe më shumë diskutimet online.

Në mungesë të një reagimi zyrtar nga palët e përfshira, publiku mbetet të gjykojë nëse kemi të bëjmë me një frymëzim artistik, një përshtatje muzikore apo një kopjim të drejtpërdrejtë të këngës ikonike shqiptare.