Një tjetër rast i trafikut të drogës është goditur në kufirin e gjelbër greko-shqiptar. Policia greke ka sekuestruar 21.5 kilogramë heroinë, që një 50-vjeçar shqiptar po përpiqej ta fuste në territorin helen.

Operacioni u zhvillua nga sektori anti-krim i Ksanthit në bashkëpunim me sektorin antidrogë të Follorinës, pas informacioneve të marra në rrugë operative për një ngarkesë droge që pritej të kalonte nga zona e Kapshticës.

Gjatë ndërhyrjes, uniformat blu ndaluan shqiptarin, i cili mbante një çantë me 43 pako heroine. Lënda narkotike u sekuestrua në cilësinë e provës materiale, ndërsa i arrestuari u dërgua përpara autoriteteve gjyqësore greke.

Hetimet vijojnë për të zbuluar nëse 50-vjeçari ishte pjesë e një rrjeti më të gjerë të trafikut ndërkombëtar të drogës.