Një skandal ka shpërthyer ndaj kompanisë Meta, pasi ka përdorur foto të nxënëseve të shkollës, vetëm 13 vjeç, për të reklamuar platformën e saj të re sociale Threads.

Sipas raportimit të The Guardian, një 37-vjeçar vuri re se reklamat që e shtynin të përdorte aplikacionin, përmbanin imazhe të vajzave me uniforma shkollore, ku dukeshin qartë fytyrat dhe në disa raste edhe emrat e tyre.

Prindërit reaguan të indinjuar, duke e cilësuar veprimin si “skandaloz” dhe “shqetësues”. Ata shpjeguan se fotot ishin marrë nga Instagram, ku ishin postuar nga vetë prindërit, të cilët nuk ishin në dijeni se kompania mund t’i përdorte ato.

Edhe pse llogaritë ishin private, postimet rezultonin të shpërndara automatikisht edhe në Threads, duke i bërë të aksesueshme.

Meta, e cila vlerësohet me 2 trilionë dollarë, u mbrojt duke deklaruar se imazhet nuk shkelin politikat e saj dhe se ato shërbejnë si “mjete rekomandimi” të ligjshme. Sipas kompanisë, fotot e përdorura janë të shpërndara publikisht dhe përputhen me standardet e komunitetit.

Megjithatë, fakti që imazhe të vajzave të mitura u përdorën për reklama, ka ngritur shqetësime serioze mbi etikën dhe mbrojtjen e fëmijëve në internet.