Prokuroria e Milanos ka dhënë rezultatet e para në hetimin për skemën mashtruese të “ministrit të rremë” Croseto, ku viktima kanë rënë disa personalitete të njohura, përfshirë Massimo Morattin, ish-presidentin e Interit.

Në Holandë, autoritetet kanë bllokuar dhe sekuestruar një llogari bankare, ku ishin transferuar afro 1 milion euro nga Moratti, i cili besonte se po ndihmonte Ministrin e Mbrojtjes ose stafin e tij për një ndihmë humanitare për Sirinë. Sipas mashtrimit, fondet do të ktheheshin më vonë përmes Bankës së Italisë, por në fakt gjithçka ishte një skemë kriminale.

Moratti ka falënderuar hetuesit për punën e bërë, duke deklaruar:
“Punë e shkëlqyer nga të gjithë për zbulimin e këtij mashtrimi.”

Nga ana tjetër, ministri i vërtetë ka sqaruar se mashtruesit kanë përdorur imitimin e zërit të tij për të mashtruar biznesmenë dhe personalitete të rëndësishme. Hetimet po vazhdojnë për të zbuluar të gjithë rrjetin e përfshirë në këtë skemë.