I dërguari i posaçëm i Shteteve të Bashkuara, Steve Witkoff, pritet të udhëtojë drejt Moskës këtë javë, konfirmoi Yuri Ushakov, këshilltar i presidentit rus Vladimir Putin për marrëdhëniet ndërkombëtare. Lajmi u bë publik nga agjencia shtetërore ruse e lajmeve TASS.

“Po, do të vijë,” u shpreh shkurt Ushakov, duke konfirmuar vizitën e Witkoff në kryeqytetin rus, e cila zhvillohet në një moment kritik për përpjekjet diplomatike që synojnë përfundimin e luftës në Ukrainë.

Steve Witkoff nuk është i panjohur për udhëtime të tilla: ai është takuar më parë tre herë me presidentin Vladimir Putin, në kuadër të përpjekjeve ndërkombëtare për të gjetur një rrugëzgjidhje paqësore për konfliktin që ka tronditur Evropën Lindore që prej shkurtit 2022.

Vizita e tij e fundit pritet të fokusohet në rivendosjen e dialogut mes Perëndimit dhe Rusisë, në një kohë kur bisedimet për paqen duket se kanë hyrë në një fazë të re, ndërsa përgatitet një tjetër raund negociatash ndërkombëtare.

Ende nuk ka një reagim zyrtar nga Departamenti Amerikan i Shtetit lidhur me agjendën e plotë të kësaj vizite.